पोखरा लेखनाथ महानगरपालिकाका मेयर मानबहादुर जिसीले फिर्के खोलामा बन्ने पैदलमार्ग (फुटट्रयाक) शुभारम्भ गर्ने क्रममा एक्कासी डोजर चल्दा ठूलो दुर्घटना हुन पुगेको छ ।
शुक्रबार बिहान ९ः४० बजेतिरको समयमा औपचारिक कार्यक्रम समापन पश्चात् डोजर चलाएर निर्माण कार्य शुभारम्भ गर्ने क्रममा घटना भएको हो । डोजर चलाउने ज्ञान नभएका मेयर जिसी अपरेटर सिटमा बसेको केहि छिनमै एक्कासी डोजरको अगाडिको बकेट बायाँतिर घुम्दा छेउमा बसेर फोटो खिच्न लागेका पत्रकारहरु र सर्वसाधारण खोलातिर गुल्टिए ।
पर्खालमाथिको रेलिङमा आड लागेर बसेका उनीहरु डोजरको अघिल्लो भाग घुमेर पर्खाल नै भत्काएपछि रेलिङसँगै भिरमा खसेका हुन् । पत्रकार रञ्जन अधिकारी, सन्देश श्रेष्ठ सहित सर्वसाधारण गरी आधा दर्जन भिरमा खसे ।
सिर्जनाचोककी गौरी पौडेललाई माथिबाट खसेको पर्खालको ढुंगाले च्यापेर खुट्टा फ्याक्चर भएको छ । सबैभन्दा तल २० मिटर जति खसेका पत्रकार अधिकारीको हात र खुट्टामा विभिन्न भागमा चोट लागेको छ । खस्ने बित्तिकै अड्कन पुगेका पत्रकार श्रेष्ठ सामान्य छन् ।
पत्रकार अधिकारी र पौडेललाई मेट्रोसिटी अस्पतालमा उपचार गरिएको छ । गण्डकन्यूज डटकमका सम्पादक अधिकारी, रेडियो अन्नपूर्णका सन्देश श्रेष्ठ लगायतका पत्रकार समाचार संकलनका क्रममा त्यहाँ पुगेका थिए । घुँडामा ढुंगाको छपनीले किचिएर गम्भिर चोट लागेका गौरी पौडेल प्रगति आमा समूहकी अध्यक्ष हुन् । उनी शुभारम्भ कार्यक्रममा सहभागी भएकी थिइन् ।
पोखरा लेखनाथ महानगरपालिका कार्यालय, वडा नं. ५ कार्यालय र फिर्के खोला वातावरण संरक्षण तथा बाटो निर्माण उपभोक्ता समिति पोखरा ५ को आयोजनामा भएको कार्यक्रममा मन्तव्यको क्रम सकिएपछि मेयर जिसी वडा अध्यक्ष धनबहादुर नेपालीसँगै डोजरमा शुभारम्भ गर्न गएका थिए । डोजर अपरेटर लिलाचन्द्र डल्लाकोटीले सिट छाडेर पछाडि सरेपछि मेयर जिसी बसे । अपरेटर सँगै थिए । पत्रकारहरु फोटो खिच्न थाले । एक्कासी डोजरको अगाडिको भाग बाँयातिर घुम्यो । पर्खालसहित रेलिङमा धक्का दिएर भत्क्यो, त्यहाँ रहेका आधा दर्जन खोलामा खसे । छेउमै रहेर फोटो खिच्ने पत्रकारहरुले भने मेयर जिसीले एकैचोटी आत्तिएर डोजरको लिभर दवाउने एक्कासी यस्तो घटना हुन पुगेको बताएका छन् ।
घटनाप्रति मेयरद्वारा दुःख व्यक्त
पोखरा लेखनाथ महानगरपालिकाका मेयर मानबहादुर जिसीले दुःखद घटना हुन पुगेकोमा आफूलाई पीडाबोध भएको बताएका छन् ।
‘यसरी चलाएर नगरौं भनेको हुँ । सबैले अपरेटर हुन्छ भनेर भने । यस्तो भयो ।’ जिसीले भने – ‘मैले सोचेको पनि थिईनँ । ठूलो दुर्घटना टरेको हो । यति भयानक दुर्घटना हुँदा पनि क्षति भएन । म असाध्यै दुःखी छु यो घटनाले ।’ उनले घाईतेको पूर्ण उपचार निःशुल्क गर्ने जनाउँदै अब आगामी दिनमा आफू सचेत रहने बताए ।
पोखरा लेखनाथ महानगर वडा नं. १८ को अँधेरी कुनादेखी ड्यामसाईडसम्म फिर्केको ६ किमीको दुरीमा पैदलमार्ग बनाउने महानगरको योजना छ । पैदलमार्ग बनाउनको लागि फिर्के खोला वातावरण संरक्षण तथा बाटो निर्माण उपभोक्ता समितिले काम सुरु गरेको छ । यो काम पोखरा ५ बाट सुरु भएको हो ।
तस्विरः नारायण शाही / अनुप प्रकाश पौडेल
सम्बन्धित ब्लगः
सम्बन्धित खबर
गण्डकी प्रदेश प्रमुख भट्ट सूर्योदय हेर्न सबेरै सराङकोटमा
सुजलले ल्यायो ‘सफल कुजिन लाइन’
गण्डकीको मुख्यमन्त्रीमा सुरेन्द्रराज पाण्डे दोस्रो पटक नियुक्त
पञ्चासेमा प्रदेश प्रमुख [फोटो फिचर]
पोखरा–सिक्लेस सडक स्तरोन्नति, अब यात्रा सहज
सम्पादक अधिकारी दोस्रो राष्ट्रिय संगीत अवार्ड समारोहमा सम्मानित
यो पनि पढौँ
पोखरामा ताल दोहन: अतिक्रमणकारी र राजनीतिज्ञ एकैठाउँमा
‘चाडबाड राम्राे दिदीबहिनीले, घर रमाइलो छोराछाेरीले’ [भिडियो सहित]
पोखरामा हुने ‘ई-प्लानेट अष्ट्रेलियन युनिभर्सिटी फेयर’ मा ३ दर्जन युनिभर्सिटी सहभागी हुँदैछन् : शर्मा
घरेलु उपचार कति प्रभावकारी !